Ka mihi aroha ki a koutou e kā hapū, e kā whānau o Moeraki. He whakaahua ēnei nō tetahi wānaka, i tīmata i te ata o te Rāhoroi i te 30 o Kai-te-haere.
He whanaukataka, he whakatū i kā tohu hou i kā urupa kā tino kaupapa o te wānaka nei.
I tīmata tā mātou mahi i te urupā o Matuatiki. I kari puare a David rāua ko Patrick mō te tohu hou, ā, i onokia ētahi tipu e Auntie Sandra rāua ko Lisa. He harakeke, he hebe, he pātītī hoki ētahi o kā momo tipu. I haere mātou ki te urupā tuarua, i tae mai ētahi atu whanauka ki te urupā tuatoru ki te tuawhā hoki. He tī kōuka, he korokio, he kāpuka kā momo rākau i onokia. He pai rawa atu te mahi a te whānau, ā, he tino ātaahua ēnei tohu hou me kā tipu hou.
Ko uncle Darkie rātou ko auntie June Tipa, ko auntie Reita Mathews, ko auntie Ngaire Coy hoki kā kaumātua i tae mai ki te tautoko i te kaupapa. I mutu te wānaka i te ahiahi o te Rātapu.
Nāia te mihi nui ki a koe David kōrua ko Patrick kā kaiwhakarite o tēnei wānaka. Me mihi ka tika ki tā mātou kaitunu rawe, ki a koe Nola, kia ora mō te kai reka.
Mā pango, mā whero, ka oti te mahi.
Ko Sandra Tipene-Hampstead te kaiwhakaahua; ko te kaituhi, ko te kaiwuru i ruka i te puke.