I raro i te korowai o Uenuku rāua ko Wairutuatai he maha ngā pūkenga reo e whakapakarihia ana. Hoki mai ai ngā whānau o Moeraki me ētahi o te whānau whānui o Ngāi Tahu e hiakai ana ki te ako i te reo Māori. Ia marama, ka hoki mai ki Moeraki me ō mātou puku pīkoko ki tēnei taonga i tuku iho mai i ō mātou tīpuna. Ko te kai a te rangatira, he kōrero.
Ko Nana Judy rāua ko pōua Darkie ngā pou manawa o te kaupapa nei. Ka mātakina mātou e rāua. Te mutunga kē mai o ō rāua wairua ātaahua, anō nei he anahera e rere ana i te kapua.
He rite tonu tā mātou hīkoi me he kārara i te papa kahere e whai ana i te kai. Ehara i te hanga he mahi māmā noa iho tēnei mahi kohi kai. Ahakoa ka hoki mai ki Moeraki mō te wā poto, he maha ngā akoranga ia rā, ia rā kia kī ai ngā puku i te kai.
Ehara i te mea i te ako mātou i te reo Māori anake, engari e hīkoi ana mātou i te haerenga o ō mātou tīpuna ki te ako i te hītori, i ngā pūrākau, i ngā tikanga o ngā mahinga kai me te kawa o tēnei marae. Ka tōia mātou ki tō mātou marae hei wāhi ako i ēnei mea, pērā i ō mātou tīpuna ki te whare wānanga o Omanawharetapu i ngā wā o mua. Kia mau ki ō tikanga me te reo Māori, koia nei rā tō tūranga teitei.
Kei waho ngā katakata a ā mātou tamariki anō nei ko te korihi a ngā manu i te ahiahi. Te maniori hoki o ngā tamariki i ētahi wā! Ka watea rātou ki te toro atu i ō rātou whenua me ngā wāhi mīharo o te takiwā o Moeraki. He wā anō ka haere ki te toro atu i te pā o Te Raka-a-Hineātea me ngā urupā o ngā kāika, ki te toro i te Whare Karakia o Te Kōtahitanga me te paeka o te waka o Araiteuru ki Matakaea. Ia hui, he haerenga anō. He pai ki ngā tamariki ngā mahi tiki pāua me ngā kūtae, te eke hoiho me te para ki tātahi anō hoki.
E toru ngā reanga i roto i tō mātou whānau ako. Ko te mea tino whakahirahira o tēnei kaupapa, kei te kitea mātou e ako ana, ā, e aroha ana ki te reo e ngā tamariki. Kātahi ka noho ngā maumahara o Moeraki i roto i ō rātou ngākau me ō rātou hinengaro hei wāhi ako ngātahi ai te whānau.
Mai i te maunga ariki kua tōpunitia e te puaheiri, e rere kau ana ōna roimata hei mātāpuna wai o te awa o Waitaki, ā, papaki ana te tai o mihi ki runga i a koe e Hana. Nāhau nei i nui ai te kākāno kua puāwaitia hai katonga mā tō whānau whānui o Moeraki.
He tika ki te mihi ki Te Mātāpuna o te Mātauraka, arā ko CPIT me te kaupapa o Kotahi Mano Kāika mō tā rātou tautoko i tēnei kaupapa. Mā ngā huruhuru te manu ka rere. Ināianei kai a mātou te tikanga kia takahia te huanui, mahia te mahi, okea ururoatia.
Walking the sands and beachcombing were popular activities.
Whānau gather around a beach fire toasting marshmellows.
Comparing finds on the beach.